CDD TA HORAS DA MATA DA MATASA 100 DA HARIN 'YAN BINDIGAR DAJI YA SHAFA DABARUN SANA'O'I A JAHAR KATSINA
Daga Kabir Ahmed S/Kuka
A wani mataki na kara habaka tattalin arzikin mata da matasa da hare haren ‘yan ta'addan daji suka shafa a jihar Katsina, Cibiyar Dimokaradiyya da Ci gaban kasa (CDD) ta horas da mata da matasa 100 dabarun sana’o’i da noma a jihar.
Wadanda suka ci gajiyar tallafin, an zabo su daga cikin al’ummomin da ke fama da munanan ayyukan ‘yan bindiga a kananan hukumomin Batsari, Jibia, Kankara da Danmusa, an horas da su ne kan noma da sana'ar dinki da rini, takalma kafinta, walda da sauran kere-kere.
Shirin samar da ayyukan yi, mai taken: 'Karfafa Al'umma Ta Hanyar Kwarewar Aiki: Gina Juriya da Inganta Rayuwar Matasa da Mata a Batsari, Danmusa, Jibia da Kankara', an gudanar da shi ne a karkashin "CDD's Reconflicts and Reconciliation Community a North West Nigeria (CMCR) )".
Aikin CMCR, wanda kungiyar Tarayyar Turai (EU) ta dauki nauyi ana aiwatar da shi ne a kananan hukumomin jihar da ke fama da ‘yan bindiga hudu tare da tallafin kungiyar kula da ‘yan gudun hijira ta duniya (IOM) da "Mercy Corps".
Da yake jawabi a lokacin horon, Manajan shirye-shiryen CDD na aikin CMCR, Kolawole Ogunbiyi, ya ce za a tallafa wa wadanda aka horas da su da injinan dinki, kayan salon gyara gashi, kayan noman ban ruwa, dabbobi da na’urorin walda domin kwato su daga kangin talauci.
Ya nanata cewa an zabo wadanda aka horas din su 100 ne domin horar da sana’o’in hannu domin suna bukatar tallafin rayuwa da zai kawo musu ci gaba domin su zama masu dogaro da kai.
Ogunbiyi ya ce: “Mun gano mutane 100 da ke bukatar tallafin rayuwa a fadin kananan hukumomin hudu, Batsari, Jibia, Danmusa da Kankara a jahar ta Katsina domin ba su fasahar sana’o’in da za su bunkasa tare da kawo musu ci gaba.
“Muna kuma ba su karfin gwuiwa da kekunan dinki, kayan kwalliya, kiwo, kayan ban ruwa noman rani, na’urorin walda da dai sauransu domin bunkasa sana’arsu da kuma samar da ‘yancin cin gashin kansu.” Daya daga cikin mahalarta taron, Yusurat Abubakar, ta ce horon ya koyar da ita dabarun dinki da sauran su da ake bukata wanda zai sa ta "dogara da kanta".