'YAN JARIDA SUN TAKA RAWAR GANIN NASARAR BABBAN ZABEN 2023 – Kanwan Katsina
An yabawa' yan jarida a jihar Katsina bisa rawar da suka taka wajen ganin an gudanar da zaben 2023 cikin nasara. Kanwan Katsina Hakimin Ketare Alhaji Usman Bello Kankara ya yi wannan yabon ne a lokacin da shugabannin kungiyar ‘yan jarida ta Najeriya NUJ reshen Jahar Katsina suka kai masa ziyarar ban girma a fadar sa. Hakimin Ya ce ‘yan jarida a jihar sun taka rawar gani wajen wayar da kan masu kada kuri’a kan tsarin zabe, rajistar PVC da tattarawa da kuma muhimmancin zabe mai cike da kura-kurai da cikas.
Har'ila yau, Kanwan na Katsina ya ƙara da cewa, 'yan jaridar sun mutunta aikin hukumar zabe mai zaman kanta ta kasa INEC a fannin zabe, tattara sakamako da kuma bayyanawa al' umma. Alhaji Usman Bello Kankara ya yabawa yadda tawagar ‘yan jaridar suka yi tattaki mai nisa da lungu da sako na jihar domin bayar da rahoton yadda aka gudanar da aikin zaben.
A yayin da yake taya shuwagabannin kungiyar da aka rantsar da su har na tsawon shekaru uku masu zuwa murna, ya kuma bukace su da su tabbatar da amincewar da aka yi musu sun rike ta ta hanyar yin aiki tukuru. Hakimin wanda ya karbi tawagar a fadar shi ya baiyana jin dadin yadda daukacin shugabannin kungiyar ta NUJ suka kai masa ziyarar ban girma tare da yi ma shi sannu da dawowar sa daga aikin Umra da ya je a kasar Saudiyya.
Kafin jawabin Kanwan sai da Shugaban kungiyar na Jihar Katsina na NUJ Kwamared Tukur Hassan Dan Ali ya ce sun je fadar Hakimin na Ketare ne domin yi masa sannu da dawowa daga tafiye-tafiyen sa da kuma wani bangare na bikin ‘yancin ‘yan jarida. Shugaban ya kara da cewa tun bayan rantsar da shi, mambobin zartaswa ba za su iya gabatar aikin kungiyar ba har sai sun ga Hakimin a matsayin na uba kuma jagora don neman goyon baya da shawarwari kamar yadda aka saba ba. Kwamared Dan Ali ya ce dan jarida a jihar Katsina yana da kyakykyawar alaka ta aiki da gwamnati, cibiyoyin gargajiya, hukumomin tsaro, ‘yan kasuwa da sauran jama’a.